7. Sakacintaniyavaggo

1. Sakacintaniyattheraapadānaṃ

‘‘Pavanaṃ kānanaṃ disvā, appasaddamannāvilaṃ;

Isīnaṃ anuciṇṇaṃva, āhutīnaṃ paṭiggahaṃ.

‘‘Thūpaṃ katvāna pulinaṃ , nānāpupphaṃ samokiriṃ;

Sammukhā viya sambuddhaṃ, nimmitaṃ abhivandahaṃ.

‘‘Sattaratanasampanno, rājā raṭṭhamhi issaro;

Sakakammābhiraddhohaṃ, pupphapūjāyidaṃ phalaṃ.

‘‘Ekanavutito kappe, yaṃ pupphamabhiropayiṃ;

Duggatiṃ nābhijānāmi, pupphapūjāyidaṃ phalaṃ.

‘‘Asītikappenantayaso, cakkavattī ahosahaṃ;

Sattaratanasampanno, catudīpamhi issaro.

‘‘Paṭisambhidā catasso, vimokkhāpi ca aṭṭhime;

Chaḷabhiññā sacchikatā, kataṃ buddhassa sāsanaṃ’’.

Itthaṃ sudaṃ āyasmā sakacintaniyo thero imā gāthāyo abhāsitthāti.

Sakacintaniyattherassāpadānaṃ paṭhamaṃ.

2. Avopupphiyattheraapadānaṃ

‘‘Vihārā abhinikkhamma, abbhuṭṭhahiya caṅkame;

Catusaccaṃ pakāsanto, deseti amataṃ padaṃ.

‘‘Sikhissa giramaññāya, buddhaseṭṭhassa tādino;

Nānāpupphaṃ gahetvāna, ākāsamhi samokiriṃ.

‘‘Tena kammena dvipadinda, lokajeṭṭha narāsabha;

Pattomhi acalaṃ ṭhānaṃ, hitvā jayaparājayaṃ.

10.

‘‘Ekattiṃse ito kappe, yaṃ pupphamabhiropayiṃ;

Duggatiṃ nābhijānāmi, pupphapūjāyidaṃ phalaṃ.

11.

‘‘Ito vīsatikappamhi, sumedho nāma khattiyo;

Sattaratanasampanno, cakkavattī mahabbalo.

12.

‘‘Paṭisambhidā catasso…pe… kataṃ buddhassa sāsanaṃ’’.

Itthaṃ sudaṃ āyasmā avopupphiyo thero imā gāthāyo abhāsitthāti.

Avopupphiyattherassāpadānaṃ dutiyaṃ.

3. Paccāgamaniyattheraapadānaṃ

13.

‘‘Sindhuyā nadiyā tīre, cakkavāko ahaṃ tadā;

Suddhasevālabhakkhohaṃ, pāpesu ca susaññato.

14.

‘‘Addasaṃ virajaṃ buddhaṃ, gacchantaṃ anilañjase;

Tuṇḍena sālaṃ paggayha, vipassissābhiropayiṃ.

15.

‘‘Yassa saddhā tathāgate, acalā supatiṭṭhitā;

Tena cittappasādena, duggatiṃ so na gacchati.

16.

‘‘Svāgataṃ vata me āsi, buddhaseṭṭhassa santike;

Vihaṅgamena santena, subījaṃ ropitaṃ mayā.

17.

‘‘Ekanavutito kappe, yaṃ pupphamabhiropayiṃ;

Duggatiṃ nābhijānāmi, buddhapūjāyidaṃ phalaṃ.

18.

‘‘Sucārudassanā nāma, aṭṭhete ekanāmakā;

Kappe sattarase āsuṃ, cakkavattī mahabbalā.

19.

‘‘Paṭisambhidā catasso…pe… kataṃ buddhassa sāsanaṃ’’.

Itthaṃ sudaṃ āyasmā paccāgamaniyo thero imā gāthāyo abhāsitthāti.

Paccāgamaniyattherassāpadānaṃ tatiyaṃ.

4. Parappasādakattheraapadānaṃ

20.

‘‘Usabhaṃ pavaraṃ vīraṃ, mahesiṃ vijitāvinaṃ;

Suvaṇṇavaṇṇaṃ sambuddhaṃ, ko disvā nappasīdati.

21.

‘‘Himavāvāparimeyyo, sāgarova duruttaro;

Tatheva jhānaṃ buddhassa, ko disvā nappasīdati.

22.

‘‘Vasudhā yathāppameyyā, cittā vanavaṭaṃsakā;

Tatheva sīlaṃ buddhassa, ko disvā nappasīdati.

23.

‘‘Anilañjasāsaṅkhubbho , yathākāso asaṅkhiyo;

Tatheva ñāṇaṃ buddhassa, ko disvā nappasīdati.

24.

‘‘Imāhi catugāthāhi, brāhmaṇo senasavhayo;

Buddhaseṭṭhaṃ thavitvāna, siddhatthaṃ aparājitaṃ.

25.

‘‘Catunnavutikappāni, duggatiṃ nupapajjatha;

Sugatiṃ sukhasampattiṃ , anubhosimanappakaṃ.

26.

‘‘Catunnavutito kappe, thavitvā lokanāyakaṃ;

Duggatiṃ nābhijānāmi, thomanāya idaṃ phalaṃ.

27.

‘‘Cātuddasamhi kappamhi, caturo āsumuggatā;

Sattaratanasampannā, cakkavattī mahabbalā.

28.

‘‘Paṭisambhidā catasso…pe… kataṃ buddhassa sāsanaṃ’’.

Itthaṃ sudaṃ āyasmā parappasādako thero imā gāthāyo abhāsitthāti.

Parappasādakattherassāpadānaṃ catutthaṃ.

5. Bhisadāyakattheraapadānaṃ

29.

‘‘Vessabhū nāma nāmena, isīnaṃ tatiyo ahu;

Kānanaṃ vanamogayha, vihāsi purisuttamo.

30.

‘‘Bhisamuḷālaṃ gaṇhitvā, agamaṃ buddhasantikaṃ;

Tañca buddhassa pādāsiṃ, pasanno sehi pāṇibhi.

31.

‘‘Karena ca parāmaṭṭho, vessabhūvarabuddhinā;

Sukhāhaṃ nābhijānāmi, samaṃ tena kutottariṃ.

32.

‘‘Carimo vattate mayhaṃ, bhavā sabbe samūhatā;

Hatthināgena santena, kusalaṃ ropitaṃ mayā .

33.

‘‘Ekattiṃse ito kappe, yaṃ kammamakariṃ tadā;

Duggatiṃ nābhijānāmi, bhisadānassidaṃ phalaṃ.

34.

‘‘Samodhānā ca rājāno, soḷasa manujādhipā;

Kappamhi cuddase āsuṃ, cakkavattī mahabbalā.

35.

‘‘Paṭisambhidā catasso…pe… kataṃ buddhassa sāsanaṃ’’.

Itthaṃ sudaṃ āyasmā bhisadāyako thero imā gāthāyo abhāsitthāti.

Bhisadāyakattherassāpadānaṃ pañcamaṃ.

6. Sucintitattheraapadānaṃ

36.

‘‘Giriduggacaro āsiṃ, abhijātova kesarī;

Migasaṅghaṃ vadhitvāna, jīvāmi pabbatantare.

37.

‘‘Atthadassī tu bhagavā, sabbaññū vadataṃ varo;

Mamuddharitukāmo so, āgacchi pabbatuttamaṃ.

38.

‘‘Pasadañca migaṃ hantvā, bhakkhituṃ samupāgamiṃ;

Bhagavā tamhi samaye, bhikkhamāno upāgami.

39.

‘‘Varamaṃsāni paggayha, adāsiṃ tassa satthuno;

Anumodi mahāvīro, nibbāpento mamaṃ tadā.

40.

‘‘Tena cittappasādena, giriduggaṃ pavisiṃ ahaṃ;

Pītiṃ uppādayitvāna, tattha kālaṅkato ahaṃ.

41.

‘‘Etena maṃsadānena, cittassa paṇidhīhi ca;

Pannarase kappasate, devaloke ramiṃ ahaṃ.

42.

‘‘Avasesesu kappesu, kusalaṃ cintitaṃ mayā;

Teneva maṃsadānena, buddhānussaraṇena ca.

43.

‘‘Aṭṭhattiṃsamhi kappamhi, aṭṭha dīghāyunāmakā;

Saṭṭhimhito kappasate, duve varuṇanāmakā .

44.

‘‘Paṭisambhidā catasso…pe… kataṃ buddhassa sāsanaṃ’’.

Itthaṃ sudaṃ āyasmā sucintito thero imā gāthāyo abhāsitthāti.

Sucintitattherassāpadānaṃ chaṭṭhaṃ.

7. Vatthadāyakattheraapadānaṃ

45.

‘‘Pakkhijāto tadā āsiṃ, supaṇṇo garuḷādhipo;

Addasaṃ virajaṃ buddhaṃ, gacchantaṃ gandhamādanaṃ.

46.

‘‘Jahitvā garuḷavaṇṇaṃ, māṇavakaṃ adhārayiṃ;

Ekaṃ vatthaṃ mayā dinnaṃ, dvipadindassa tādino.

47.

‘‘Tañca dussaṃ paṭiggayha, buddho lokagganāyako;

Antalikkhe ṭhito satthā, imā gāthā abhāsatha.

48.

‘‘‘Iminā vatthadānena, cittassa paṇidhīhi ca;

Pahāya garuḷaṃ yoniṃ, devaloke ramissati’.

49.

‘‘Atthadassī tu bhagavā, lokajeṭṭho narāsabho;

Vatthadānaṃ pasaṃsitvā, pakkāmi uttarāmukho.

50.

‘‘Bhave nibbattamānamhi, honti me vatthasampadā;

Ākāse chadanaṃ hoti, vatthadānassidaṃ phalaṃ.

51.

‘‘Aruṇavā satta janā, cakkavattī mahabbalā;

Chattiṃsatimhi āsiṃsu, kappamhi manujādhipā.

52.

‘‘Paṭisambhidā catasso…pe… kataṃ buddhassa sāsanaṃ’’.

Itthaṃ sudaṃ āyasmā vatthadāyako thero imā gāthāyo abhāsitthāti.

Vatthadāyakattherassāpadānaṃ sattamaṃ.

8. Ambadāyakattheraapadānaṃ

53.

‘‘Anomadassī bhagavā, nisinno pabbatantare;

Mettāya aphari loke, appamāṇe nirūpadhi.

54.

‘‘Kapi ahaṃ tadā āsiṃ, himavante naguttame;

Disvā anomadassiṃ taṃ , buddhe cittaṃ pasādayiṃ.

55.

‘‘Avidūre himavantassa, ambāsuṃ phalino tadā;

Tato pakkaṃ gahetvāna, ambaṃ samadhukaṃ adaṃ.

56.

‘‘Taṃ me buddho viyākāsi, anomadassī mahāmuni;

Iminā madhudānena, ambadānena cūbhayaṃ.

57.

‘‘Sattapaññāsakappamhi, devaloke ramissati;

Avasesesu kappesu, vokiṇṇaṃ saṃsarissati.

58.

‘‘Khepetvā pāpakaṃ kammaṃ, paripakkāya buddhiyā;

Vinipātamagantvāna, kilese jhāpayissati.

59.

‘‘Damena uttamenāhaṃ, damitomhi mahesinā;

Pattomhi acalaṃ ṭhānaṃ, hitvā jayaparājayaṃ.

60.

‘‘Sattasattatikappasate, ambaṭṭhajasanāmakā;

Catuddasa te rājāno, cakkavattī mahabbalā.

61.

‘‘Paṭisambhidā catasso…pe… kataṃ buddhassa sāsanaṃ’’.

Itthaṃ sudaṃ āyasmā ambadāyako thero imā gāthāyo abhāsitthāti.

Ambadāyakattherassāpadānaṃ aṭṭhamaṃ.

9. Sumanattheraapadānaṃ

62.

‘‘Sumano nāma nāmena, mālākāro ahaṃ tadā;

Addasaṃ virajaṃ buddhaṃ, lokāhutipaṭiggahaṃ.

63.

‘‘Ubho hatthehi paggayha, sumanaṃ pupphamuttamaṃ;

Buddhassa abhiropesiṃ, sikhino lokabandhuno.

64.

‘‘Imāya pupphapūjāya, cetanāpaṇidhīhi ca;

Duggatiṃ nābhijānāmi, buddhapūjāyidaṃ phalaṃ.

65.

‘‘Ekattiṃse ito kappe, yaṃ pupphamabhiropayiṃ;

Duggatiṃ nābhijānāmi, buddhapūjāyidaṃ phalaṃ.

66.

‘‘Chabbīsatimhi kappamhi, cattārosuṃ mahāyasā;

Sattaratanasampannā, rājāno cakkavattino.

67.

‘‘Paṭisambhidā catasso…pe… kataṃ buddhassa sāsanaṃ’’.

Itthaṃ sudaṃ āyasmā sumano thero imā gāthāyo abhāsitthāti.

Sumanattherassāpadānaṃ navamaṃ.

10. Pupphacaṅkoṭiyattheraapadānaṃ

68.

‘‘Abhītarūpaṃ sīhaṃva, garuḷaggaṃva pakkhinaṃ;

Byagghūsabhaṃva pavaraṃ, abhijātaṃva kesariṃ.

69.

‘‘Sikhiṃ tilokasaraṇaṃ, anejaṃ aparājitaṃ;

Nisinnaṃ samaṇānaggaṃ, bhikkhusaṅghapurakkhataṃ.

70.

‘‘Caṅkoṭake ṭhapetvāna, anojaṃ pupphamuttamaṃ;

Saha caṅkoṭakeneva, buddhaseṭṭhaṃ samokiriṃ.

71.

‘‘Tena cittappasādena, dvipadinda narāsabha;

Pattomhi acalaṃ ṭhānaṃ, hitvā jayaparājayaṃ.

72.

‘‘Ekattiṃse ito kappe, yaṃ kammamakariṃ tadā;

Duggatiṃ nābhijānāmi, buddhapūjāyidaṃ phalaṃ.

73.

‘‘Sampuṇṇe tiṃsakappamhi, devabhūtisanāmakā;

Sattaratanasampannā, pañcāsuṃ cakkavattino.

74.

‘‘Paṭisambhidā catasso…pe… kataṃ buddhassa sāsanaṃ’’.

Itthaṃ sudaṃ āyasmā pupphacaṅkoṭiyo thero imā gāthāyo abhāsitthāti.

Pupphacaṅkoṭiyattherassāpadānaṃ dasamaṃ.

Sakacintaniyavaggo sattamo.

Tassuddānaṃ –

Sakacintī avopupphī, sapaccāgamanena ca;

Parappasādī bhisado, sucinti vatthadāyako.

Ambadāyī ca sumano, pupphacaṅkoṭakīpi ca;

Gāthekasattati vuttā, gaṇitā atthadassibhi.