Pāduddhāravimhayadīpanīgāthā

65.

Yāvañcayaṃ ravi caratyacalena ruddhe,

Yāvañca cakkaratanañca payāti loke;

Tāvissaro nabhacaro jitacāturanto,

Hitvā kathaṃ nu padamuddhari so nirāso.

66.

Dīpe mahā ca caturādhikadvesahasse,

Tatrāpi seṭṭhabhajitaṃ varajambudīpaṃ;

Bhūnābhikaṃ kapilavatthupuraṃ surammaṃ,

Hitvā kathaṃ nu padamuddhari so nirāso.

67.

Ñātīnasīti kulato hi sahassa sākye,

Hatthissadhaññadhanino vijitārisaṅghe;

Gottena gotamabhavaṃ pitarañjanaggaṃ,

Hitvā kathaṃ nu padamuddhari so nirāso.

68.

Rammaṃ surammavasatiṃ ratanujjalantaṃ,

Gimhepi vimhayakaraṃ suramandirābhaṃ;

Ussāpitaddhajapaṭākasitātapattaṃ,

Hitvā kathaṃ nu padamuddhari so nirāso.

69.

Sapokkharā pokkharaṇī catasso,

Supupphitā mandirato samantā;

Kokā nadantūpari kokanāde,

Hitvā kathaṃ nu padamuddhari so nirāso.

70.

Sare saroje ruditāḷipāḷi,

Samantato passati pañjarañjasā;

Disvāravindāni mukhāravindaṃ

Nāthassa lajjā viya saṃkujanti.

71.

Madhurā madhurābhirutā,

Caritā padume padumeḷigaṇā;

Vasatiṃ adhunā madhunā,

Akaruṃ jahitaṃ kimidaṃ patinā.

72.

Tamhā rasaṃ madhukarā bhavanaṃ haritvā,

Ninnādino samadhuraṃ madhuraṃ karonti;

Nādena nādamatiriccupavīṇayanti,

Naccanti tā surapure vaṇitā va tāva.

73.

Sañcoditā pīṇapayodharādharā,

Virājitānaṅgajamekhalākhalā;

Suraṅgaṇā vaṅgajaphassadā sadā,

Ramā ramāpenti varaṅgadāgadā.

74.

Karātirattā ratirattarāmā,

Tāḷenti tāḷāvacare samantā;

Naccuggatānekasahassahatthā,

Sakkopi kiṃ sakyasamoti codayuṃ.

75.

Visālanettā hasulā sumajjhā,

Nimbatthanī vimhayagītasaddā;

Alaṅkatā malladharā suvatthā,

Naccanti tāḷāvacarehi ghuṭṭhā.

76.

Yāsaṃ hi loke upamā natthi,

Tāsaṃ hi phassesu kathāvakāsā;

Taṃ tādisaṃ kāmaratiṃnubhonto,

Hitvā kathaṃ nu padamuddhari so nirāso.

77.

Pādepāde valayaviravāmekhalāvīṇānādā,

Gītaṃgītaṃ patiratikaraṃ gāyatī gāyatī sā;

Hatthehatthe valayacalitā sambhamaṃ sambhamanti,

Disvādisvā iti ratikaraṃ yāti hāhā kimīhā.